坐言起行第一撃...邀請家人去旅行

今年, 是我第三年邀請家人參加教會一年一度的大旅行。

第一年, 我邀請了爸爸媽媽, 只有媽媽答應。 老公都邀請了他的爸爸媽媽, 可惜當日他媽媽病了, 臨時缺席。我媽媽怕悶, 找來婆婆同阿姨相伴, 再加上一個百厭星--諾諾。媽媽為了照顧百厭星, 好多時避開了詩歌, 見證分享的時間。

第二年, 我又邀請了爸爸媽媽, 今次兩個都答應。爸爸參加的目的, 是為了吃豐富的海鮮餐。結果, 到出發的前一日, 爸爸話要OT, 所以又剩下媽媽一個。媽媽又為了照顧百厭星, 又再避開詩歌, 見證分享的時間。

今年, 我再邀請了爸爸媽媽, 兩個都答應。老公都邀請了他的爸爸媽媽, 兩個亦都答應。今次, 我決定唔帶百厭星去。

報名後, 我們晚晚為他們禱告: 為爸爸們不用在假期開工禱告, 也為媽媽們身體禱告, 又為整個行程同天氣禱告。當日, 我並沒有為父母能否出席而擔憂, 因為已經完全將這事交託神。

我們三家六口一齊參加旅行, 感覺超開心。 ^o^

頭一站去香港公園,我們一行百幾人坐在奧林匹克廣場唱詩歌,我媽媽居然拍手打拍子(Wooh!!!) 然後玩集體遊戲, 我爸媽玩得好投入, 但奶奶老爺就避開唔玩。跟著自由活動, 我哋去溫室賞花。呢個活動全家都鍾意, 因為兩個爸爸都是識花之人。

第二站去珍寶海鮮舫食午飯。兩位好食嘅爸爸大顯身手: 除咗顯示自己嘅食力之外, 再駛出一招 -- 你敬我一件, 我還你一塊.....目的係掃走檯上嘅食物。但係.....我覺得倒尷尬呢!!唉!

最後一站去海防博物館。我爸爸是一個愛國者, 從細到大我都被他灌輸咗唔少民族意識, 這趟啱哂佢。我哋一齊欣賞研究, 又學咗寶貴嘅一課。


後記:

1. 我爸爸好滿意今次旅行, 日後有機會會繼續參加 (yeah!!)
2. 我媽媽已被陸姑娘邀請參加11/26的聚會, 雖然我唔知她最後會否出席.....但我會繼續大膽邀請
3. 周姑娘在車上講見證時, 父母們似是睡著了, 但原來, 至少奶奶佢有聽.....因為佢靜靜地問我老公: 周姑娘的老公最後搵到工作嗎?

生命影響生命 -- 再次被影響

在讀大學的時候, 認識了一位知己。 她是一位基督徒, 很愛主, 願意分享自己的經歷, 常常開口感謝神, 甚至唱詩跳舞讚美神。 因為她, 令到多年離開神的我, 重新尋找依靠神。 這是她第一次令我的生命有著深遠的影響。

過了多個年頭, 我們仍然是好朋友。 因為我這幾年工作超繁忙的原故, 很久沒有聯絡。 前陣子, 她約我去她新居聚舊暢談。 一傾就傾了三, 四個鐘. 好開心!!

最開心, 最感動的, 莫過於她的媽媽信了主, 而她的爸爸亦開始返教會。

她父母一向都拜偶像, 她曾經跟她爸爸因信仰問題吵了無數次。 約七, 八年前, 她開始邀請她媽媽在每年的母親節返教會。去年, 她邀請她媽媽參加佈道會, 她媽媽在她毫無心理準備的情況下, 在呼召的時候, 要她的女兒陪自己出去。我朋友又驚又喜, 當然樂意陪她出去決志啦! 自始她媽媽就信主, 返教會喇。(但其實朋友已經望穿秋水, 等了好多年先有這好結果…)

她的爸爸, 並不是被她媽媽的影響而返教會。這幾年他身體有毛病, 朋友教會的牧師探訪他。經過多次的探訪, 牧師只邀請了他兩次返教會, 在不告訴自己女兒的情況下, 他自己返了教會。雖然他現在還未決志, 但有時他會向太太暗示: “好似信神好啲呀嗨” (意思比拜偶像好), 而且他自己定時返教會呢!

朋友的分享, 驅使我為家人的靈魂緊張, 我也要努力為家人祈禱, 多作一點大膽的邀請, 並仰望神的工作。

老朋友相聚

十月十日(星期一), 我終於約咗兩位好耐冇見的大學同學聚餐(已經兩年幾冇見)。她們都是我最好的朋友。以前我們會間中食飯, 通電話, send email, shopping等, 但自從結婚之後,因為工作超忙的關係, 跟好多朋友都沒有時間聯絡。其實我真係好掛住佢地.....

終於見面啦, 開頭都好擔心唔知點樣打開話匣子, 但係好朋友始終都係好朋友, 佢地好關心我點解好似人間蒸發咁唔見咗咁耐, 打電話又唔通, send email 又唔覆, 最擔心就係SARS嗰年, 以為我發生咗咩事......因為我一向都好有交代, 而且又會喺佢地生日嘅時候send email/message俾佢地, 但呢兩年都冇我消息, 佢地真係好擔心呀.....唉!!! 我都唔想架, 日日做到冇停手, 放工已經三更半夜, 過住啲非人生活, 公司又check唔到街外email, 返到屋企都瞓覺啦.....我細佬又搬走咗我部電腦, 連email address list 都冇埋, 舊email account又close咗.....總言而之, 慘啦!!! 不過, 今年五月開始, 終於離開咗呢個咁恐怖嘅地方。

但係在過去的兩年幾, 我missed咗好多次舊同學的聚會, 原來有幾個男同學已經結咗婚...佢地係有用email邀請我的, 可惜, 我完全唔知......唉!! 都無辦法啦.....唯有同佢地解釋, 相信佢地唔會怪我嘅...

不過, 當晚我地傾得好開心, update番大家嘅近況, 好耐冇試過啦!! 我地傾咗三個幾鐘呀, 哈 :D

完美主意 – 出版啦!!

等等等等等.....終於等到啦。
其實自從知道圈中人紛紛開blog之後, 我便立刻開了一個。但係因為性格使然 --> 追求完美, 不過又無時間噃, 足足"拖"到宜家先出版囉...
原本有好多嘢想講架, 堆堆埋埋,好似想出書咁, 但係似乎每日都有啲嘢想post...都係開咗先啦...稍後再發佈原本想講嗰啲啦。
話雖如此, 請各位千奇唔好寄予厚望, 這個blog只係純粹個人追求完美, 表達意見的地方, 並唔代表這個blog係完美架噃!! 嘻...

請多多指教!